Fréttir
Áhrif nýrra grunnleiðbeininga Alþjóða Geislavarnaráðsins
Umhverfisráðherra Þýskalands, Sigmar Gabriel, ávarpaði ráðstefnuna og lagði áherslu á mikilvægi samræmingar í geislavörnum í löndum Evrópu. Hann hvatti þáttakendur til að halda vöku sinni og bregðast fljótt við ef fram kæmu upplýsingar sem bentu til þess að skaðleg áhrif geislunar gætu verið meiri en talið hefði verið.
Lars Erik Holm, formaður Alþjóða geislavarnaráðsins kynnti grunnleiðbeiningarnar en þær taka mið af aukinni þekkingu hvað varðar eðli, eiginleika og áhrif jónandi geislunar sem og breyttum viðhorfum í geislavörnum. Nýju grunnleiðbeiningarnar eru einfaldari og skýrari í framsetningu en fyrri grunnleiðbeiningar og leggja meiri áherslu á umhverfið. Geislunaraðstæður eru nú flokkaðar í þrennt: skipulagðar aðstæður, neyðaraðstæður og ríkjandi aðstæður. Mat á áhættu vegna jónandi geislunar hefur ekki breyst sem neinu nemur og grundvallaratriði geislavarna eru enn þau sömu: réttlæting á starfsemi sem getur valdið geislun, bestun til þess að geislun sé eins lítil og unnt er með tilliti til aðstæðna og alltaf innan geislunarmarka sem ICRP setur fyrir skipulagðar geislununaraðstæður.
Elisabet Cardis kynnti niðurstöður faraldsfræðilegrar rannsóknar sem beindist að stafsmönnum í kjarniðnaði. Um er að ræða umfangsmikla rannsókn sem beinist að meira en 400 þúsund starfsmönnum í 15 löndum. Niðurstöður gefa til kynna heldur meiri áhættu en niðurstöður faraldsfræðilegra rannsókna á þeim er lifðu af kjarnsprengjunar í Hiroshima og Nagasaki. Munurinn er ekki tölfræðilega marktækur og gefur því ekki tilefni til endurmats geislunarmarka.
Einnig voru á ráðstefnunni kynntar niðurstöður stórra rannsókna á tengslum radon og lungnakrabbameins. Jafnframt var fjallað um áhrif sem niðurstöður rannsókna í geislalíffræði hafa haft á regluverk og framkvæmd geislavarna.
Síðari hluti ráðstefnunnar var helgaður áhrifum nýrra grunnleiðbeininga á löggjöf Evrópusambandsins og aðildarríkja þess. Ekki er gert ráð fyrir miklum breytingum en þó þarf að taka tillit til nýrra nálgana hvað varðar geislavarnir við neyðaraðstæður og við ríkjandi aðstæður. Gert er ráð fyrir að faglegri endurskoðun á grunnlöggjöf Evrópusambandsins ljúki árið 2009.
