Notendum ljósabekkja fækkar áfram

29.4.2009

Samstarfshópur um varnir gegn útfjólublárri geislun var stofnaður í byrjun árs 2004. Í hópnum eru fulltrúar frá Geislavörnum ríkisins, Landlæknisembættinu, Félagi íslenskra húðlækna, Lýðheilsustöð og Krabbameinsfélaginu. Hópurinn hefur á hverju ári staðið fyrir átakinu Hættan er ljós sem beint er gegn ljósabekkjanotkun fermingarbarna. Fyrir hönd hópsins hefur Capacent-Gallup fylgst með ljósabekkjanotkun á Íslandi með könnunum á hverju vori.

Capacent-Gallup hefur nýlokið árlegri könnun þar sem spurt var hvort viðkomandi hefði farið í ljósabekk að minnsta kosti einu sinni undanfarna tólf mánuði. Um 18% sögðust hafa gert það. Vikmörk eru 2,8%. Könnunin náði til 1300 Íslendinga á aldrinum 16-75 ára. Árið 2004 sögðust um 30%  hafa notað ljósabekki.

Myndin sýnir niðurstöður árlegra kannanna undanfarinna ára. Á henni sést hlutfall þeirra sem fór í ljós á aldrinum 16 – 75 ára (með 95% vikmörkum):

Helstu notendur ljósabekkja eru ungar konur en þó hefur nokkur hópur karla notað ljósabekki. Myndin að neðan sýnir hlutfall karla og kvenna sem sögðust nota ljósabekki:

Hér eru óvissa mun meiri en í fyrri mynd. Frá árinu 2004 hefur mikil fækkun orðið bæði meðal karla og kvenna sem nota ljósabekki.  Á síðasta ári var athyglisvert hversu mikil fækkun virðist hafa orðið meðal karla.

Til samanburðar má geta þess að sænskar kannanir 2005, 2006 og 2007 sýndu að um 15% Svía á aldrinum 18-74 ára notuðu ljósabekki og voru konur tvöfalt fleiri en karlarnir.