Nú stendur yfir alþjóðleg ráðstefna í Vínarborg um áhrif slyssins í kjarnorkuverinu í Tsjernóbýl 1986. Ný skýrsla 8 stofnana Sameinuðu þjóðanna var kynnt í tilefni ráðstefnunnar og þar kemur fram að nú megi rekja tæp 50 dauðsföll beint til slyssins og að áætla megi að um 4000 manns muni látast vegna langtímaáhrifa geislunar. Þetta eru lægri tölur en oft hafa verið nefndar, en þó í samræmi við mat ýmissa vísindamanna strax í upphafi. Slysið hefur þó haft víðtæk önnur heilsufars-, félagsleg- og efnahagsleg áhrif.

Framfarir í gerð leysidíóða hafa orðið til þess að æ fleiri tæki eru nú komin á markað sem nýta slíkar díóður, t.d. leysibendar. Leysibendar með rauðu ljósi hafa verið á markaði í um áratug, en nú eru komnir á markað leysibendar með grænu ljósi (bylgjulengd 532 nm). Augað er mun næmara fyrir grænu ljósi en rauðu og því virðist ljós frá grænum leysibendi meir en 10x bjartara en rauðum með sama afl. Leysibendar eru missterkir og óvarleg notkun sterkra leysibenda getur verið varasöm og þeir eru engin leikföng. Hér eru því birt ráð til þeirra sem hyggjast kaupa leysibenda eða önnur tæki sem senda frá sér leysigeisla.

Geislavarnir bjóða nú í haust upp á tvö námskeið í samstarfi við Endurmenntunarstofnun HÍ.

Fyrra námskeiðið (206H05) heitir Ábyrgðarmenn röngentækja og geislavarnir og verður haldið laugardaginn 10. september kl. 9:00 - 16:00.
Seinna námskeiðið (208H05) nefnist Geislavarnir og viðhald röntgentækja og verður haldið laugardaginn 15. október kl. 9:00 -18:00.

Nánari upplýsingar um námskeið og skráningu.

Grein um áhrif ljóss á augað hefur verið sett á vefsíðu Geislavarna ríkisins

Breska læknaritið BMJ (British Medical Journal) birti 29. júní niðurstöður mjög fjölmennrar rannsóknar í mörgum löndum á áhrifum lítillar geislunar. Niðurstöður renna stoðum undir gildandi forsendur geislavarna, að lítil geislun geti aukið lítillega hættu á krabbameini.