Að frumkvæði Geislavarna ríkisins er hafin vinna við að tengja saman myndgreiningardeildir landsins, þannig að aðgengi deildanna og tilvísandi lækna að eldri rannsóknum verði betra. Talið er að aukið og bætt aðgengi að fyrri rannsóknum geti fækkað rannsóknum og þannig dregið úr geislaálagi sjúklinga, ásamt því að koma í veg fyrir óþarfa inngripsrannsóknir og jafnvel aðgerðir.

Breska útvarpsstöðin BBC World Service leggur í þessari og næstu viku áherslu á umfjöllun um geislavá: Ólöglega útbreiðslu geislavirkra efna og kjarnorkusprengja. Hún útvarpar í þessari og næstu viku tveggja þátta dagskrá Nuclear Detectives. Hún fjallar um alþjóðlega samvinnu til að hafa hemil á ólöglegri dreifingu og notkun geislavirka efna. Á vef BBC má hlusta á upptöku fyrri þáttar og einnig á þann síðari, eftir að hann hefur verið fluttur. Þar mun væntanlega einnig verða hægt að hlusta á hinn þáttinn, Who Will Explode The Next Nuclear Bomb?

Geislavarnir ríkisins hafa gefið út skýrslu með niðurstöðum mælinga stofnunarinnar á styrk geislavirks sesíns í andrúmslofti, úrkomu, mjólk, lambakjöti, sjó, fiski og þangi. Styrkur efnanna er í öllum tilvikum vel innan marka sem miðað er við í milliríkjaviðskiptum með matvæli. Niðurstöður mælinga benda til að um litlar breytingar sé að ræða á styrk sesíns síðustu árin, almennt fara meðalgildi þó lækkandi. Skýrsluna, ?Vöktunarmælingar Geislavarna ríkisins 2005 má nálgast hér á PDF formi.