Tilhæfulaus orðrómur um geislavá getur haft töluverðan skaða í för með sér, bæði félagslega og efnahagslega. Jafnframt er mikilvægt að geta brugðist fljótt við þegar um raunverulega geislavá er að ræða.  Norrænar geislavarnastofnanir hafa náið samstarf um miðlun og greiningu á fregnum og orðrómi um ýmis konar geislavá.  Þetta kom að góðum notum þegar upp kom kvittur um kjarnorkuslys í suðurhluta Rússlands þann 20. maí síðast liðinn.  Könnun leiddi í ljós að um ekkert slys var að ræða, hins vegar höfðu yfirvöld staðið fyrir viðbúnaðaræfingu á svæðinu.