Stjórn Norrænna kjarnöryggisrannsókna ( Nordisk kernsikkerhedsforskning, NKS) hélt fund í Reykjavík þann 19. nóvember 2008. Á fundinum voru samþykktar tillögur um auknar fjárveitingar til rannsókna.

Geislavarnir ríkisins hafa innleitt gæðakerfi samkvæmt ISO 9001:2000 staðlinum og nýlega fengið það vottað af bresku staðlastofnuninni, British Standard Institute, BSI. Gæðakerfið lýsir markmiðum og starfsemi stofnunarinnar en með vottuninni er staðfest að unnið sé eftir þessari lýsingu. Gæðakerfið er mikilvægt tæki til að bæta og treysta starfsemina.

Strangar reglur gilda um alla meðferð geislavirkra efna. Við breytingar í rekstri fyrirtækja (eða gjaldþrot) og mannaskipti eykst þó hætta á að öryggisvitneskja fari forgörðum. Við slíkar aðstæður geta geislavirk efni orðið munaðarlaus og tæki sem innihaldanda slík efni farið í brotajárn. Það getur haft alvarlegar efnahagslegar afleiðingar og því brýnt að allir hlutaðeigandi haldi vöku sinni.

Hvalfjarðargöngin gætu reynst hentugur staður til kvörðunar næmra geislamæla vegna þess hve geislun í þeim er lítil. Þess vegna hafa geislavarnastofnanir á Norðurlöndum nýlega sýnt göngunum áhuga.

12. ráðstefna Alþjóða geislavarnafélagsins var haldin í Argentínu, 20. - 24. október s.l.. Ráðstefnuna sóttu yfir 1600 sérfræðingar á ýmsum sviðum geislavarna frá meira en 90 löndum.

Alþjóðakjarnorkumálastofnunin, IAEA, hélt 52. ársfund sinn í Vín daganna 29. september til 4. október 2008. Meira en 130 aðildarríki tóku þátt í að samþykkja ályktanir um störf stofnunarinnar og framtíðarstefnu á sviði geislavarna, kjarnorkustarfsemi, yfirfærslu kjarnatækni og varnir gegn útbreiðslu kjarnavopna.

Geislavarnir Svíþjóðar hafa krafið sænsk kjarnorkuver um úttekt vegna veilu sem fannst í stjórnstöng í einu þeirra. Veilan hafði ekki alvarlegar afleiðingar í för með sér, en hart hefur verið brugðist við enda eru öryggisviðmið í rekstri kjarnorkuvera mjög ströng.

Nýlega koma út nýtt vefrit á vefsetri ALARA-Network. Í nóvember 2004 var í frétt á vef Geislavarna vakin athygli á og sagt frá starfsemi EAN- ALARA netsins.

Skömmu eftir miðnætti 16. til 17. september mátti merkja á mælum Geislavarna ríkisins aukningu styrks náttúrulegrar geislunar í Reykjavík. Um þetta leyti fóru leifar fellibyljarins Ike yfir Ísland og fylgdi hellirigning. Styrkur náttúrulegrar geislunar eykst oft samfara miklum rigningum og þetta mátti t.d. einnig sjá við Höfn í Hornafirði aðfaranótt 7. október.

Nýlega kom út hjá Elsevier nýtt rit frá Alþjóðageislavarnaráðinu eða rit númer 105 (ICRP Publication 105) sem ber heitið "Radiation Protection in Medicine" eða geislavarnir í læknisfræði og var það samþykkt til útgáfu í október 2007.

Stöðugt birtast nýjar upplýsingar á þessu vefsetri Alþjóðakjarnorkumálastofnunarinnar (IAEA), ásamt því að eldra fræðsluefni er uppfært. Þetta er áhugavert vefsetur fyrir þá sem vinna við jónandi geislun í læknisfræði.

Alþjóðakjarnorkumálastofnunin (IAEA) hefur óskað eftir að fá að nota íslenska skýrslu sem fyrirmynd fyrir ríki sem ekki nýta kjarnorku, en þurfa engu að síður að uppfylla kröfur alþjóðlegs samnings um örugga meðferð notaðs eldsneytis og örugga meðferð geislavirks úrgangs. Einnig var vísað til Íslands sem fyrirmyndar fyrr á þessu ári varðandi annan alþjóðlegan samning sem IAEA varðar.

Geislavörnum ríkisins berast reglulega fyrirspurnir um farsíma og hugsanleg áhrif þeirra á heilsu fólks. Stofnunin hefur því m.a. birt fréttatilkynningar með veftilvísunum í þær heimildir sem umræðan hefur byggst á. Þessar tilvísanir hafa nú verið teknar saman, uppfærðar og settar undir fræðsluefni á vefsetri stofnunarinnar.

Myndband sem sýnir fjóra farsíma poppa maís hefur gengið manna á milli um allan heim. - Þetta myndband er gabb.

Aukin tíðni sortuæxla meðal ungra kvenna á Íslandi vekur athygli danska krabbameinsfélagsins

Enn á ný staðfestir viðhorfskönnun ánægju viðskiptavina Geislavarna og veitir mikilvægar upplýsingar um viðhorf þeirra til einstakra þátta í þjónustu stofnunarinnar. Geislavarnir ríkisins hafa síðastliðin 4 ár látið framkvæma viðhorfskönnun meðal viðskiptavina sinna. Könnuninni var sérstaklega beint til þeirra viðskiptavina sem lúta eftirliti stofnunarinnar. Könnunin sem fram fór dagana 19. maí til 02. júní, er liður í mati á framkvæmd og árangri stefnu stofnunarinnar.

Evrópskar geislavarnastofnanir eru að þróa með sér ákveðið samstarf. Á vegum þeirra starfa nú nokkrir starfshópar og einnig hafa forstjórar þeirra fundað tvívegis. Síðasti fundur þeirra var haldinn í París 19. maí.

Forstjóri Geislavarna ríkisins, Sigurður M. Magnússon var nýlega kjörinn formaður Norræna geislavarnafélagsins, NSFS, á ráðstefnu félagsins í Noregi 26.-30. maí 2008. Næsta ráðstefna NSFS verður á Íslandi eftir þrjú ár.

Í gær kom fram minniháttar bilun í kjarnorkuverinu í Krsko í Slóveníu. Upplýsingum um hana var miðlað skjótt til grannríkja og alþjóðastofnana. Þetta endurspeglar framfarir sem hafa orðið á síðari árum í skilvirkri og opinni miðlun upplýsinga um bilanir í kjarnorkuverum.