Meðal efnis er að sagt er frá nýlegri grein um aukið geislaálag og áhættu vegna endurtekinna tölvusneiðmyndarannsókna í Bandaríkjunum. Þá er einnig fjallað um nýlegt rit frá Geislavarnastofnun Bandaríkjana (NCRP) um geislaálag almennings í Bandaríkjunum.

Fóstur í móðurkviði er viðkvæmt fyrir jónandi geislun og því lögð áhersla á að það verði fyrir sem minnstri geislun ef móðirin þarf nauðsynlega að fara í myndgreiningarannsókn á meðan hún er ólétt. Nýlega hafa félög röntgenlækna og geislafræðinga í Bretlandi ásamt Heilsuverndarstofnun Bretlands gefið út endurskoðaðar leiðbeiningar um geislavarnir barnshafandi kvenna við slíkar rannsóknir.

Viðbúnaðardeild IAEA kynnti í fréttabréfi sínu síðasta mánaðar nýja uppfærslu á viðbúnaðarvef deildarinnar, sem þróaður var í samvinnu við Geislavarnir ríkisins og bandarískan ráðgjafa. Vefurinn og það rit sem hann byggir á er orðinn sá alþjóðlegi grunnur sem margar viðbúnaðarstofnanir miða við varðandi fyrstu viðbrögð við geislavá. Unnið er að því að taka vefinn í notkun hérlendis, sem grunn samvinnu Geislavarna ríkisins við ýmsa samstarfsaðila.