Á vefsetri IAEA um geislavarnir sjúklinga í læknisfræði, var birt frétt fyrir stuttu, þar sem sagt er frá tveimur nýbirtum rannsóknum sem sýna aukna notkun á læknisfræðilegum rannsóknum sem hafa í för með sér hátt geislaálag fyrir sjúklinga. Um er að ræða greinar sem birtust nýlega í AJR og NEJM.

Norrænu geislavarnastofnanirnar gáfu í dag út sameiginlega fréttatilkynningu og ráðleggingar vegna radons, sem er geislavirk lofttegund. Radon myndast í bergi og getur aukið líkur á krabbameini, sérstaklega hjá þeim sem reykja. Styrkur radons er tiltölulega mikill í Noregi, Svíþjóð og Finnlandi. Hérlendis er berg hins vegar snautt af þeim efnum sem mynda radon.

Út er komið nýtt rit hjá IAEA sem markar tímamót í geislavistfræði. Í því eru viðmiðunargildi sem gera mögulegt að meta dreifingu geislavirka efna til umhverfis og í því. Beri geislaslys að höndum, þá er mjög mikilvægt að geta metið afleiðingar þess með alþjóðlega viðurkenndum hætti. Alþjóðakjarnorkumálastofnunin, IAEA, gaf fyrir 15 árum út rit með viðmiðunargildum sem hafa verið notuð til að meta áhrif dreifingar geislavirkra efna.  Nú er komin út ný og mjög stækkuð útgáfa þessa rits.  Starfsmaður Geislavarna ritstýrði einum undirkafla bókarinnar í samvinnu við þrjá aðra.