Eftirlitskerfi CTBTO nýtist til flóðbylgjuviðvörunar
Hnattrænt eftirlitskerfi CTBTO (Comprehensive Nuclear-Test-Ban Treaty Organization) kom að góðum notum þegar jarðskjálfti skók Chile að morgni 27. febrúar sl. Gögn frá um 20 jarðskjálftastöðvum voru send samstundis til viðvörunarmiðstöðva, þ.á.m. í Ástralíu og Bandaríkjunum (Hawaii) og stuðluðu þannig að því að viðvörunum um hugsanlega flóðbylgju var komið áleiðis til Chile og annarra S-Ameríkuríkja, sem og um Kyrrahafssvæðið allt, fyrr en ella. Hnattrænt eftirlitskerfi CTBTO (Comprehensive Nuclear-Test-Ban Treaty Organization) kom að góðum notum þegar jarðskjálfti skók Chile að morgni 27. febrúar sl. Gögn frá um 20 jarðskjálftastöðvum voru send samstundis til viðvörunarmiðstöðva, þ.á.m. í Ástralíu og Bandaríkjunum (Hawaii) og stuðluðu þannig að því að viðvörunum um hugsanlega flóðbylgju var komið áleiðis til Chile og annarra S-Ameríkuríkja, sem og um Kyrrahafssvæðið allt, fyrr en ella.
Vísindarit birtir norræna grein um vanmetin áhrif stýriþátta í viðbúnaðarlíkani
Áhætta af völdum geislavirks úrfellis er í mörgu allt önnur hérlendis en búast mætti við væri reynslu frá öðrum löndum beitt án aðlögunar. Íslenskar aðstæður eru í mörgu frábrugðnar aðstæðum í grannríkjum okkar. Geislavarnir ríkisins hafa lengi átt náið samstarf með samsvarandi stofnunum á hinum Norðurlöndunum um rannsóknir á sviði viðbúnaðar, þar á meðal geislavistfræði. Afrakstur þessa hefur birst í mörgum skýrslum og vísindaritum, nú síðast í grein sem birt hefur verið í Radiation Protection Dosimetry.
Hættan er ljós: Ungt fólk á ekki að fara í ljósabekki
Nú er að hefjast átak sem beinist að fermingarbörnum og forráðamönnum þeirra þar sem bent er á hættuna sem fylgir því að ungt fólk fari í ljósabekki. Skilaboðin eru frá Félagi íslenskra húðlækna, Geislavörnum ríkisins, Krabbameinsfélaginu, Landlæknisembættinu og Lýðheilsustöð. Þetta er sjöunda árið sem farið er í fræðsluherferð undir slagorðinu „Hættan er ljós“. Birtar verða auglýsingar í dagblöðum og á vefsíðum, m.a. Facebook, og fjallað um málið í fjölmiðlum
Nýtt rit um viðbúnaðarstarfsemi Geislavarna ríkisins
Geislavarnir ríkisins gáfu í dag út skýrsluna Viðbúnaður við geislavá - Viðbúnaðarstarfsemi Geislavarna ríkisins. Ritið lýsir þeim grunni sem viðbúnaður stofnunarinnar hvílir. Hann tekur ekki einungis til bráðra heilsufarslegra áhrifa, heldur einnig sálrænna, félagslegra og efnahagslegra. Ýmsir þættir í skipulagi viðbúnaðar eru nú í örri þróun, lýsingin í ritinu miðast við síðari hluta árs 2009.
Notkun geislunar í lækningum. Upplýsingar fyrir sjúklinga og almenning á vefsetri IAEA
Nýlega bættist við nýtt efni á vefsetri IAEA um geislavarnir sjúklinga í læknisfræði. Um er að ræða fræðsluefni fyrir sjúklinga og almenning, um notkun jónandi geislunar í lækningum og skiptist efnið í nokkra flokka.
Ný handbók IAEA með viðmiðunargildum í geislavistfræði
Út er komin hjá IAEA ný handbók í geislavistfræði, sem skilgreinir viðmiðunargildi sem notuð eru til að lýsa tilfærslu geislavirkra efna sem berast út í umhverfið. Reikna má með að handbókin verði á komandi árum notuð sem viðmið þegar meta skal áhrif þessa. Einn sérfræðinga Geislavarna ritstýrði ásamt þremur öðrum kafla um geislavistfræði norðurslóða í fylgiriti handbókarinnar.
Geislavarnir ná 100 % árangri í alþjóðlegri samanburðarprófun
Geislavarnir ríkisins tóku síðastliðinn desember þátt í samanburðarprófun National Physical Laboratory (NPL), en hún felst í að greina óþekkta blöndu geislavirkra efna. Af þeim 72 rannsóknastofum sem tóku þátt í prófuninni að þessu sinni, þá voru Geislavarnir í hópi þeirra 18 sem fengu umsögnina „Top Lab“ og í hópi þeirra 9 sem fundu öll efnin og tilgreindu rétt magn innan áætlaðra óvissumarka. Þetta er í annað sinn sem stofnunin tekur þátt í þessari árlegu prófun, árangur í fyrra var einnig jafngóður.
Viðbótargeislun á flugfarþega vegna hertra öryggisráðstafana er lítil
Öryggisráðstafanir á flugvöllum hafa verið hertar vegna tilraunar til hryðjuverks í bandarískri flugvél í lok síðasta árs. Á mörgum flugvöllum verður nú tekin upp skimun farþega með öflugri myndgreiningartækni. Eðlilegt er að spurningar vakni um þá geislun sem því kann að fylgja, enda fylgdi mikil geislun gegnumlýsingartækni sem notuð var á fyrri hluta síðustu aldar. Þessari nýju tækni fylgir hins vegar mjög lítil geislun. Deilur um kerfin hafa einkum snúist um þær myndir sem þau skila af sér, ýmsum finnst þær sýna yfirborð líkama farþega of vel.
