Fréttir
Virt vísindarit, Journal of Environmental Radioactivity, birtir grein starfsmanna Geislavarna um geislavirkt sesín (Cs-137) í íslenskum eldfjallajarðvegi
Tímaritið Journal of Environmental Radioactivity hefur birt grein um eiginleika eldfjallajarðvegs (Andosol) til að binda geislavirkt sesín. Greinin ber titilinn Radiocaesium fallout behaviour in volcanic soils in Iceland og er unnin af starfsmönnum Geislavarna ríkisins í samvinnu við sérfræðinga á Rannsóknarstofnun Landbúnaðarins og Centre for Ecology and Hydrology í Englandi.
Höfundar eru Magnús Á. Sigurgeirsson, Ólafur Arnalds, Sigurður Emil Pálsson, Brenda J. Howard og Kjartan Guðnason. Íslenskur eldfjallajarðvegur hefur í mörgu aðra eiginleika en þær jarðvegsgerðir sem algengar eru erlendis. Eitt varasamasta efnið í geislavirku úrfelli er geislavirkt sesín (Cs-137) og íslenskur eldfjallajarðvegur bindur það ekki eins fast og margar aðrar jarðvegsgerðir gera. Sesínið getur því verið aðgengilegt plöntum í langan tíma eftir úrfelli og áhrifa þess gætt lengur og meir en ella.
Greinin mun birtast í prentuðu hefti ritsins á næsta ári, en hún var gerð aðgengileg á Vefnum 30. nóvember. Hana má t.d. nálgast í gegnum vef Hvar.is.
Bein krækja í greinina Radiocaesium fallout behaviour in volcanic soils in Iceland
