Ljósabekkjanotkun unglinga hefur minnkað verulega á einu ári

23.5.2005

Um 13% unglinga á aldrinum 12-15 ára segjast hafa farið í ljós á síðustu tólf mánuðum, samkvæmt nýrri könnun IMG Gallup. Í könnun fyrir einu ári svöruðu 25% sömu spurningu játandi. Þessar niðurstöður voru kynntar á aðalfundi Krabbameinsfélagsins þann 7. maí s.l.

Könnunin nú var gerð í mars og apríl fyrir Geislavarnir ríkisins, Krabbameinsfélagið, Landlæknisembættið og Félag íslenskra húðlækna, en undanfarin tvö ár hafa þessir aðilar hvatt fermingarbörn til að fara ekki í ljós. Nær helmingi minni ljósabekkjanotkun unglinga er talin til marks um að átakið hafi haft áhrif. Í könnuninni nú kom fram að um þrefalt fleiri stúlkur en piltar fóru í ljós og að af þeim unglingum sem fóru í ljós síðasta árið hafði aðeins tíundi hver farið mánaðarlega eða oftar.

Fjöldi unglinga (12-15 ára) sem svaraði spurningunni í fyrri könnun var 421 en í ár var fjöldinn 433. Fullyrða má að töluverð minnkun í ljósabekkjanotkun sé tölfræðilega marktæk. Á næstu árum munu sömu aðilar fylgjast áfram með ljósabekkjanotkun unglinga.

Í sambærilegri könnun meðal fullorðinna (16-75 ára), sem gerð var um svipað leyti, kom einnig fram að dregið hefði úr ljósabekkjanotkun frá því í fyrra. Í fyrra sögðust 31% þeirra sem svöruðu nota ljósabekki en 26% árið áður. Samdrátturinn er hlutfallslega meiri meðal kvenna en karla og er ekki síst í yngri aldurshópunum. Einkum hefur fækkað í hópi þeirra sem hafa farið oft í ljós.