Styrkir fyrir unga vísindamenn

3.11.2006

Norrænar kjarnöryggisrannsóknir (NKS) eru samtök sem hafa starfað með einum eða öðrum hætti í áratugi. Þau hafa stutt norrænt samstarf og rannsóknaverkefni á sviði kjarnöryggistækni, geislavistfræði, viðbúnaðar og skyldra greina. Þótt Norðurlönd hafi í auknum mæli tekið virkan þátt í verkefnum Evrópusambandsins, þá skiptir hið nána og óformlega samstarf innan NKS enn miklu máli, að sumu leyti jafnvel enn meira en fyrr. Lykilatriði í starfi NKS hefur verið að hlúa að starfsumhverfi ungra vísindamanna á þessu sviði, hjálpa þeim við að efla tengsl sín í milli og stuðla að hvetjandi starfsumhverfi. Stjórn NKS ákvað því að styrkja umsókn hóps af ungu fólki, sem hefur tekið að sér að halda ráðstefnu í Helsinki, Finnlandi, 14.-15. desember 2006. Þar gefst ungu fólki í geislaeðlifræði, geislaefnafræði, geislavistfræði, geislavörnum og skyldum greinum, tækifæri til að kynna starf sitt og rannsóknir. Jafnframt verður kynnt almennt hvað hefur verið að gerast í þessum greinum og norræn samvinna innan NKS á þessu sviði.
Þessum greinum er lítið sinnt á Íslandi (a.m.k. hvað kennslu varðar), en þeim mun dýrmætara getur það verið ungum vísindamönnum á ofangreindum sviðum að komast í nánari tengsl við norræna starfsfélaga, þá sem eru að hefja feril sinn og hina sem lengra eru komnir.
Nánari upplýsingar um ráðstefnuna má fá á vefsíðu NKS helgaðri ráðstefnunni (http://www.nks.org)

Senda þarf skráningu og útdrátt erindis/veggspjalds eigi síðar en 20. nóvember (framlengdur frestur) til aðalskipuleggjanda ráðstefnunnar, Elisabeth Strålberg, elisas@ife.no. Það er að sjálfsögðu hægt að taka þátt í ráðstefnunni án þess að halda erindi og leggja fram útdrátt (þá ber að senda inn þátttökutilkynningu og hafa eyðu þar sem titill erindis á að vera). Ferðastyrkir eru hins vegar einungis veittir þeim sem hafa sent inn útdrátt vegna erindis/veggspjalds.

Sigurður Emil Pálsson, sep@gr.is, rannsóknastjóri Geislavarna ríkisins, getur einnig veitt nánari upplýsingar, en hann hefur haft yfirumsjón með verkefnum NKS á sviði geislavistfræði í rúman áratug og á sviði geislavistfræði og viðbúnaðar (NKS-B) síðast liðin 4 ár.

Almenn vefsíða NKS http://www.nks.org/

Sjá einnig fyrri fréttir Geislavarna tengdar starfi NKS:

26.7.2006: Norrænt samstarf á sviði geislavistfræði og viðbúnaðar gegn geislavá undir stjórn rannsóknastjóra Geislavarna ríkisins

10.3.2006 : Þátttaka Geislavarna ríkisins í norrænu verkefni um áhrif losunar geislavirkra efna í holræsakerfi borga

24.11.2005 : Forstjóri Geislavarna ríkisins verður næsti stjórnarformaður NKS
17.11.2005 : Norræn ráðstefna um geislavistfræði og mælitækni í Tartu í Eistlandi.
25.4.2005 : Íslenskar niðurstöður kynntar á norrænum fundi vinnuhóps um geislavistfræði