Ráðstefna IAEA um hlutverk vöktunar og rannsókna vegna nýtingar kjarnorku

25.5.2007

Á síðustu árum hafa æ meiri efasemdir komið fram um notkun hefðbundinna orkugjafa (olíu og kola) vegna alvarlegra áhrifa sem hún getur haft á andrúmsloft jarðar. Nýting kjarnorku er nú æ meir til umræðu sem ein lausn á þessum alvarlega vanda. Kjarnorka hefur verið nýtt í um hálfa öld. Á þessum tíma hafa kröfur um takmörkun mengunar umhverfis stóraukist. Mælitækni og þekkingu á hegðun geislavirkra efna hefur fleygt fram á þessum tíma. Hins vegar hefur samdráttur í kjarnorkuiðnaði leitt til fækkunar sérfræðinga og mörg ríki ráða illa við að fylgja eftir þeim markmiðum sem þau hafa sett sér, t.d. um að geta fylgst með hreinleika umhverfis. Sum þessara markmiða hafa einnig verið sett á veikum fræðilegum grunni, þannig að vöktun umhverfis byggð á þeim verður ómarkviss.

Alþjóða­kjarnorkumálastofnunin (IAEA) gekkst því fyrir alþjóðlegri vísindaráðstefnu í Vínarborg, 23.-27. apríl, International Conference on Environmental Radioactivity: From Measurements and Assessments to Regulation, þar sem fjallað var um hlutverk vöktunar og rannsókna nú á tímum við stjórnun nýtingar kjarnorku og geislavirkra efna og hvar umbóta sé helst þörf. Fjallað var um marga þætti sem hafa áhrif á mat á magni og hegðun geislavirkra efna í umhverfinu, svo sem marktækni sýnatöku, efnagreiningu og mælitækni, líkanagerð og túlkun og að lokum hvernig nýta megi þá vitneskju sem allt þetta gefur. Mikil áhersla var á hvernig mætti sýna fram á gæði hvers af framangreindum þáttum, allir hafa þeir áhrif á lokaniðurstöðu. Ráðstefnan mun vonandi hjálpa til við að glæða vitund um að átaks sé þörf á þessu sviði og að mikilvæg verkefni bíði úrlausnar.

Einn starfsmanna Geislavarna, Sigurður Emil Pálsson, tók þátt í ráðstefnunni og kynnti jafnframt áfanganiðurstöður rannsókna sinna á veggspjaldi, Use of precipitation data for assessing radionuclide deposition. Rannsóknin byggist á að nota úrkomugögn til að meta magn og dreifingu geislavirks úrfellis.

Sjá nánar vefsíðu ráðstefnunnar á vefsetri IAEA