Norræn ráðstefna - erindi um alþjóðleg þróunarverkefni Geislavarna ríkisins

14.9.2007

Ráðstefnan er hluti af samstarfi sem nefnist Norrænar kjarnöryggisrannsóknir og er skammstafað NKS á skandinavískum tungumálum, sjá nánar vefsetur samvinnunnar, www.nks.org. Hluti samstarfsins fjallar um viðbúnað gegn geislavá og geislavistfræði og er nefnt NKS-B. Það er sá hluti samvinnunnar sem Sigurður Emil stýrir (sjá nánar eldri frétt) og ráðstefnan var hluti þessa starfs. Sigurður Emil skipulagði ráðstefnuna og stjórnaði henni, en hún var haldin hjá geislavarnastofnun norska ríkisins (sjá www.nrpa.no). Fyrri daginn var áhersla á verkefni sem snerta geislavistfræði og og þann síðari á verkefni sem snerta viðbúnað. Þátttakendur á ráðstefnunni voru 35 og 21 erindi var flutt. Sigurður Emil flutti tvö erindi um alþjóðleg þróunarsamvinnuverkefni sem Geislavarnir ríkisins eiga aðild að. Hið fyrra var flutt að höfðu samráði við viðbúnaðarmiðstöð Alþjóða kjarnorkumálastofnunarinnar (IAEA) og fjallaði um samvinnu við miðstöðina um þróun á einfaldaðri útgáfu viðbúnaðarvefseturs miðstöðvarinnar (sjá nánar eldri frétt). Þessi einfaldaða útgáfa lítur eins út gagnvart notanda, en gerir ekki kröfur um nettengingu og gerir litlar kröfur til tölvu (hægt að nota á lófatölvum og snjallsímum). Lýsing á sameiginlegri æfingu Geislavarna ríkisins og lögreglu og slökkviliðs höfuðborgarsvæðisins vakti einnig athygli. Í umræðum kom í ljós að sambærilegar æfingar hafa ekki verið haldnar í ýmsum grannlöndum okkar og var óskað eftir greinargerð um æfinguna. Síðara erindið var flutt að beiðni geislavarnastofnunar Finnlands (STUK)og fjallaði um samvinnu við þróun geislaskimunarbúnaðar (sjá nánar eldri frétt).
Dagskrá ráðstefnu (PDF skjal)