Fréttir
Náttúruleg geislun jókst á meðan Ike fór yfir Ísland
Skömmu eftir miðnætti 16. til 17. september mátti merkja á mælum Geislavarna ríkisins aukningu styrks náttúrulegrar geislunar í Reykjavík. Um þetta leyti fóru leifar fellibyljarins Ike yfir Ísland og fylgdi hellirigning. Styrkur náttúrulegrar geislunar eykst oft samfara miklum rigningum og þetta mátti t.d. einnig sjá við Höfn í Hornafirði aðfaranótt 7. október.
Náttúruleg geislun stafar að mestu frá berggrunni og jarðvegi. Íslenska basaltið er mjög snautt af geislavirkum efnum og náttúruleg geislun er því lítil á Íslandi. Rigning getur skolað skammlífum geislavirkum efnum til jarðar, bæði efnum frá jarðvegi og einnig efnum sem myndast í háloftum vegna geimgeisla. Þótt hér sé um afskaplega lítið magn efna að ræða (þau skipta engu í heilsufarslegu tilliti) þá eru þau mælanleg með næmum geislamælum.
Skömmu eftir miðnætti 16. - 17. september mátti sjá slíka aukningu á mæli Geislavarna ríkisins í Reykjavík, sbr. mynd hér að neðan. Geislunin fór upp í 70 nSv/klst en er venjulega um 50 nSv/klst.
Myndin að neðan yfir uppsafnaða úrkomu sýnir að um sama leyti var hellidemba í Reykjavík (rúmlega 30 mm).
Í desember á síðasta ári mátti sjá enn skýrari dæmi um þetta: Þá sýndi geislamælistöð Geislavarna í Reykjavík um 80 nSv/klst sbr. meðfylgjandi:
Myndin að neðan sýnir að þá var líka um 30 mm úrkoma eins og aðfaranótt 17. september.
Svipuð vensl geislunarstyrks og regns mátti einnig sjá í þessari viku (aðfaranótt 7. október) við Höfn í Hornafirði. Sjá línurit yfir styrk geislunar:
og uppsafnaða úrkomu:
Jafnan er hægt að fylgjast með mælingum Geislavarna á styrk geislunar á fjórum stöðum á landinu með því að fara á vefsíðu Geislavarna ríksins.
http://www.gr.is/gammastodvar/
Þar eru birt línurit yfir geislun einn sólarhring og eina viku aftur í tímann fyrir hvern stað. Jafnframt er þar að finna samsvarandi línurit yfir uppsafnaða úrkomu. Þessi gögn eru tekin saman í samvinnu við Veðurstofu Íslands.
