Öryggisúttekt á sænskum kjarnorkuverum

22.10.2008

Rekstraraðili kjarnorkuversins í Oskarshamn tilkynnti Geislavörnum Svíþjóðar (SSM) í síðustu viku að brot hefði uppgötvast í einni af stjórnstöngum kjarnakljúfs nr. 3 í verinu og að við frekari athugun hefðu fundist sprungur í öðrum. Þótt hér sé ekki um alvarlega skemmd að ræða, þá er þetta veila sem ekki var búist við og geislavarnastofnunin mun því fara yfir niðurstöðu skýrslu rekstraraðilans um orsakir þessa og einnig hefja eigin rannsókn.  Svipaða kjarnakljúfa er einnig að finna í öðrum sænskum kjarnorkuverum og rekstraraðili versins í Forsmark ákvað í kjölfarið að loka kjarnakljúf nr. 3 til að kanna hvort svipaðar veilur leyndust þar.  Geislavarnir Svíþjóðar ákváðu síðan á grunni þessa að krefja öll sænsk kjarnorkuver, þar sem kjarnakljúfar af þessari gerð eru í notkun, um úttekt á hvort þessa veilu kynni að vera að finna í fleiri kjarnakljúfum.  Niðurstöðum þarf að skila á morgun, fimmtudaginn 23. október.  Kjarnakljúfarnir sem um ræðir eru nr. 1 og 2 í verinu í Forsmark og nr. 1 og 2 í verinu í Oskarshamn.  Skila ber greinargerðum vegna kljúfa nr. 1 í Ringhals, nr. 3 í Forsmark og nr. 3 í Oskarshamn áður en leyfi fæst til að ræsa þá að nýju.

Stjórnstangirnar eru notaðar til að stýra afli kljúfanna og stöðva þá.  Margar stangir eru notaðar í hverjum kjarnakljúf og auk þess er annar búnaður tiltækur til neyðarstöðvunar.  Brot í einni stöng hefur því ekki alvarleg áhrif.  Þessar ákveðnu aðgerðir Geislavarna Svíþjóðar endurspegla ekki að um hættu sé eða hafi verið að ræða, heldur að öryggisviðmið í þessum rekstri eru mjög ströng.  Allar veilur sem upp kunna að koma eiga að vera fyrirsjáanlegar og tekið er hart á því ef óvæntar veilur birtast. 

Sjá nánar fréttatilkynningar Geislavarna Svíþjóðar:

Sprickbildningar i styrstavar på OKG

SSM begär in redovisningar från kärnkraftverken