Lítið dregur úr ljósabekkjanotkun grunnskólanema

14.5.2009

Samstarfshópur um varnir gegn útfjólublárri geislun var stofnaður í byrjun árs 2004. Í hópnum eru fulltrúar frá Geislavörnum ríkisins, Landlæknisembættinu, Félagi íslenskra húðlækna, Lýðheilsustöð og Krabbameinsfélaginu. Hópurinn hefur á hverju ári staðið fyrir átakinu Hættan er ljós. Fyrir hönd hópsins hefur Capacent-Gallup fylgst með ljósabekkjanotkun á Íslandi með könnunum á hverju vori. Spurt er hvort viðkomandi hafi notað ljósabekk síðastliðna 12 mánuði.

Capacent-Gallup hefur árlega gert tvenns konar kannanir, annars vegar meðal 1300 manna þjóðarúrtaks 16-75 ára og hins vegar meðal 1800 manna úrtaks ungmenna 12-23 ára. Hér er sagt frá nýjum niðurstöðum úr ungmennakönnuninni en áður var sagt frá niðurstöðum þjóðarkönnunnar á vefsíðu Geislavarna (29. apríl 2009).

Fólk um tvítugt er sá hópur sem mest notar ljósabekki. Meðal þeirra sem orðnir eru tvítugir hefur orðið töluverð fækkun notenda, sérstaklega á síðasta ári, samanber myndina hér að neðan.

Á meðal 12-15 ára grunskólanemenda, mældist mikil fækkun notenda árið 2004 þegar átakinu Hættan er ljós var hleypt af stokkunum en því var sérstaklega beint gegn notkun fermingarbarna á ljósabekkjum. Á seinni árum hefur notendum í þessum aldurshópi hins vegar ekki fækkað.

Næsta mynd sýnir heildarniðurstöðu þegar búið er að sameina umrædda þrjá aldurshópa og koma þar fram 95% vikmörk. Notendum á aldrinum 12-23 ára hefur fækkað marktækt frá árinu 2004 en engu að síður er fækkunin ekki jafn mikil og kannanir meðal 16-75 ára hafa sýnt (sbr. frétt um það frá 29. apríl 2009).

Þær niðurstöður sem hér hafa verið kynntar benda til þess að erfitt sé að hafa langvarandi áhrif á lífsvenjur unglinga með kynningarstarfi.

ÞS