Notendur ljósabekkja fara sjaldnar í ljós

1.6.2010

Capacent-Gallup hefur nýlokið árlegri könnun þar sem spurt var hvort viðkomandi hefði nýlega notað ljósabekk. Könnunin náði til 1300 Íslendinga á aldrinum 16-75 ára. Árið 2004 sögðust um 30% hafa notað ljósabekki síðustu 12 mánuði en nú segjast 18% hafa gert það, sem er svipað og á síðasta ári. Þeim sem fara oft í bekki eða að minnsta kosti einu sinni í mánuði heldur þó áfram að fækka. Hlutfall þeirra hefur farið úr rúmlega 7% árið 2004 í rúmlega 1% árið 2010.

Myndin sýnir niðurstöður kannanna undanfarinna ára. 95% vikmörk eru um +/-3% á kvarða myndarinnar.

Myndin að neðan er einnig úr sömu könnunum Capacent-Gallups og sýnir hlutfall allra svarenda sem fór oft í bekk eða að minnsta kosti einu sinni í mánuði.

Sú þróun sem kemur fram á myndinni er sérstaklega ánægjuleg í ljósi þess að í vandaðri rannsókn á ljósabekkjanotkun 100 þúsund norskra og sænskra kvenna í 8 ár var komist að þeirri niðurstöðu að þær sem notuðu bekki einu sinni eða oftar í mánuði væru í aukinni áhættu að fá sortuæxli (Veierød, 2003).

Samstarfshópur um varnir gegn útfjólublárri geislun var stofnaður í byrjun árs 2004. Í hópnum eru fulltrúar frá Geislavörnum ríkisins, Landlæknisembættinu, Félagi íslenskra húðlækna, Lýðheilsustöð og Krabbameinsfélaginu. Hópurinn hefur á hverju ári staðið fyrir átakinu Hættan er ljós sem beint er gegn ljósabekkjanotkun fermingarbarna. Fyrir hönd hópsins hefur Capacent-Gallup fylgst með ljósabekkjanotkun á Íslandi með könnunum á hverju vori.

Grein sem vísað er til:

http://jnci.oxfordjournals.org/cgi/content/short/95/20/1530

ÞS