Fréttir
Eldur í rússneskum kjarnorkukafbáti - engin geislavá
Fréttir hafa borist í dag af eldi í rússneskum kjarnorkukafbáti, þar sem hann er í slipp vegna viðhalds, í Murmansk í norðurhluta Rússlands. Skv. fregnum hafa engin geislavirk efni sloppið til umhverfis og ekki er ástæða til að ætla að svo verði. Geislavarnir ríkisins fylgjast með þessu máli í samvinnu við systurstofnanir á Norðurlöndum.
Samkvæmt fréttum, þá var slökkt á kjarnakljúf bátsins og ennfremur voru engin kjarnorkuvopn í honum, enda vart við öðru að búast á meðan báturinn er í slipp. Geislunarmælistöðvar sem Geislavarnir ríkisins hafa aðgang að sýna enga hækkun. Það er því hvorki ástæða til að ætla að geislavirk efni hafi borist til umhverfis í tengslum við þetta slys né að þau eigi eftir að gera það. Unnt verður að staðfesta síðar með mælingum á svifryki að geislavirk efni hafi ekki borist til umhverfis í umtalsverðu magni.
Geislavarnir munu halda áfram að fylgjast með þessu slysi í samvinnu við norrænar geislavarnastofnanir, en frekari fregna er ekki að vænta af slysinu af hálfu stofnunarinnar.
Nánari upplýsingar veitir Sigurður Emil Pálsson, sep@gr.is
