Nýjar reglugerðir um geislavarnir taka gildi

24.9.2003

Þann 28. ágúst s.l. tóku gildi 3 nýjar reglugerðir um geislavarnir sem settar eru með stoð í lögum nr. 44/2002 um geislavarnir. Um er að ræða reglugerð um geislavarnir vegna notkunar tannröntgentækja (nr. 626/2003), reglugerð um geislavarnir vegna notkunar röntgentækja annarra en tannröntgentækja, við læknisfræðilega geislun (nr. 640/2003) og reglugerð um hámörk geislunar starfsmanna og almennings vegna notkunar jónandi geislunar (nr. 627/2003).

Í reglugerðunum um tannröntgentæki og almenn röntgentæki er verið samræma íslenska löggjöf um geislavarnir og framkvæmd hennar að tilskipunum Evrópusambandsins um geislavarnir og framkvæmdar þeirra í aðildarlöndum þess. Þessar tilskipanir eru m.a. um skipulag geislavarna vegna notkunar geislatækja sem gefa frá sér jónandi geislun, um CE-merkingar slíkra tækja, gæðaeftirlit með tækjum og um eftirlit með geislaskömmtum sjúklinga og starfsfólks. Við setningu reglugerðanna var m.a. tekið mið af sambærilegum reglugerðum sem settar hafa verið í Danmörku, Finnlandi og Svíþjóð.

Í reglugerðinni um hámörk geislunar er verið að lögfesta þau hámarks gildi sem Alþjóðageislavarnaráðið (ICRP) ráðleggur í sambandi við þá geislun sem starfsmenn sem vinna við jónandi geislun og almenningur getur orðið fyrir. Einnig er fjallað um flokkun vinnusvæða, flokkun starfsmanna, geislavarnir barnshafandi starfsmanna og eftirlit Geislavarna ríkisins með geislaálagi starfsmanna sem vinna við jónandi geislun.