Fréttir
Kynning fimmtud. 20. nóv. á rannsóknum í geislavistfræði í tilefni af komu Dr. Brendu Howard, MBE
Geislavarnir ríkisins hafa tekið þátt í rannsóknaverkefnum í geislavistfræði frá því að rannsóknstofa var sett upp við stofnunina haustið 1989. Þetta starf hefur að mestu verið í íslenskum rannsóknaverkefnum, sem hafa að jafnaði verið unnin í samvinnu við íslenskar rannsóknastofnanir. Þessi verkefni hafa verið innan ramma norrænna verkefna og tengsl við norræna vísindamenn hafa verið byggð upp á grunni þeirra. Niðurstöður hafa til þessa einkum verið kynntar á erlendum vettvangi.
Tengsl við vísindamenn utan Norðurlanda hafa verið aukin á undanförnum árum. Hæst ber þar samvinnu við Brendu Howard, Centre for Ecology and Hydrology í Bretlandi. Hún hefur verið virk í rannsóknum í geislavistfræði í rúma tvo áratugi, stýrt 7 rammaverkefnum Evrópusambandsins, lagt til efni í nokkrar af handbókum Alþjóðakjarnorkumálastofnunarinnar (IAEA) og verið leiðandi í ýmsum alþjóðlegum rannsóknaverkefnum, t.d. á vegum AMAP (Arctic Monitoring and Assessment Programme). Henni var nýlega veitt MBE orða breska ríkisins vegna framlags síns til vísinda. Brenda Howard verður á Íslandi í næstu viku (viku 47) vegna sameiginlegra rannsóknaverkefna hennar og Geislavarna ríkisins.
Í tilefni af komu Brendu Howard bjóða Geislavarnir ríkisins til kynningarfundar á rannsóknum í geislavistfræði fimmtudaginn 20. nóvember n.k. kl. 16:15 og er miðað við að fundurinn standi til um 17:30. Brenda Howard mun kynna stuttlega alþjóðlegar rannsóknir á þessu sviði og íslenskar rannsóknir síðasta áratugar verða kynntar lauslega og þær sem nú standa yfir. Verulegur hluti kynningarinnar verður á ensku.
Þeir sem hafa áhuga á að sitja þennan fund eru vinsamlegast beðnir að hafa samband við Geislavarnir ríkisins eigi síðar en á hádegi þriðjudaginn 18. nóvember. Fundarstaður verður valinn með hliðsjón af væntanlegum fjölda þátttakenda og tilkynntur þeim sem lýst hafa áhuga á þátttöku.
Þátttöku má tilkynna með tölvupósti í netfang: gr@gr.is og í síma: 552 8200
