Vöktun á styrk geislunar (gammageislunar) á 4 stöðum á Íslandi

Vöktunin er hluti viðbúnaðar gegn geislavá á Íslandi. Starfræktar eru 4 stöðvar sem mæla gammageislun. Niðurstöður mælinganna sýna náttúrulega bakgrunnsgeislun. Hún er breytileg bæði eftir stað og tíma, t.d. getur úrkoma skolað geislavirkum efnum úr lofthjúpi til jarðar. Íslenskt berg er mjög rýrt af geislavirkum efnum, það er þó mismunandi eftir svæðum hversu lítill styrkurinn er. Stöðvarnar myndu sýna marktæka aukningu ef mökkur geislavirkra efna bærist til Íslands frá kjarnorkuslysi erlendis.

Þessar mælingar eru samstarfsverkefni Geislavarna ríkisins og Veðurstofu Íslands. Geislamælar hafa verið settir upp á 4 sjálfvirkum mælistöðvum Veðurstofunnar (Reykjavík, Bolungarvík, Raufarhöfn og Höfn í Hornafirði). Línurit yfir styrk geislunarinnar eru birt á vefjum Geislavarna ríkisins (www.geislavarnir.is) og Veðurstofu Íslands (www.vedur.is), auk þess sem gögnin eru gerð aðgengileg erlendum samstarfsaðilum.

Bilun hefur komið upp í tveimur gammstöðvum, í Reykjavík og á Raufarhöfn. Fram komu truflanir (toppar) sem höfðu ekkert með dreifingu geislavirkra efna í umhverfi að gera.   Að höfðu samráði við framleiðanda hafa þeir mælar verið teknir niður og sendir til Þýskalands í viðgerð.  Gert er ráð fyrir að þeir komi aftur og verði settir upp í apríl 2012. Geislavarnir reka aðra gammamælistöð í Reykjavík og eru mælingar frá henni vaktaðar af starfsmönnum stofnunarinnar.

Línuritin sýna styrk geislunar undanfarna viku. Með því að smella á heiti mælistöðvar má fá nánari upplýsingar um mælingar á hverjum stað.  Gögn eru birt án tafar og hafa ekki verið yfirfarin fyrir birtingu og geta því leynst í þeim truflanir og falskir toppar (þannig að eitt gildi hoppi upp).